KSSH/LRDR – Aktiviteti hapës i projektit “Marrëdhëniet e Punës në Rajonin e Danubit”.

KSSH mori pjesë në aktivitetin hapës të projektit “Marrëdhëniet e Punës në Rajonin e Danubit” (LRDR), i cili mblodhi së bashku përfaqësues të sindikatave, organizatave rinore dhe politikëbërës nga vendet e Rajonit të Danubit dhe më gjerë, për të diskutuar mbi të ardhmen e punës, dialogun social, pjesëmarrjen e të rinjve dhe procesin e zgjerimit të Bashkimit Evropian.

KSSH u përfaqësua në këtë Konferencë Hapëse nga:

– Kol Nikollaj, President i KSSH-së,

– Anisa Subashi, Drejtore e QTSSSH-së

– Dirida Nikollaj, Koordinatore e Rrjetit të Rinisë së KSSH-së dhe Koordinatore e projektit LRDR për Shqipërinë.

Në panelin “Zëra të Rinj, Zgjedhje Evropiane: Pjesëmarrja, Demokracia dhe Zgjerimi i BE-së në Rajonin e Danubit”, Dirida Nikollaj, Koordinatores e Rrjetit të Rinisë, prezantoi perspektivën e të rinjve punëtorë nga Shqipëria dhe Ballkani Perëndimor, duke theksuar sfidat që lidhen me punësimin e pasigurt, emigracionin e të rinjve, nevojën për punë të denjë, paga të drejta dhe përfshirje reale në proceset vendimmarrëse por dhe që KSSH ka qenë ndër organizatat sindikale që ka investuar vazhdimisht në përfshirjen e të rinjve, jo vetëm si anëtar të saj apo pjesëmarrës në aktivitete, por si aktorë aktivë në strukturat e saj.

Po aq e vlefshme ishte pjesëmarrja në workshop-in për Koordinatorët mbi organizimin rinor dhe komunikimin në rrjetet sociale, ku u shkëmbyen përvoja dhe praktika nga Austria dhe vendet pjesëmarrëse mbi mënyrat e angazhimit të të rinjve në lëvizjen sindikale duke përdorur mjetet digjitale për forcimin e organizimit.

Përvojat, idetë dhe bashkëpunimet e krijuara gjatë këtyre ditëve do të shërbejnë si bazë për aktivitetet që do të zhvillohen në Shqipëri përmes workshop-eve në shkolla dhe iniciativave të tjera të projektit LRDR.

Siç KSSH është shprehur gjithnjë “E ardhmja e punës nuk ndërtohet për të rinjtë, por bashkë me ta”.