“Drejtësi fiskale dhe solidaritet social , barra duhet të zhvendoset drejt kapitalit dhe pasurisë”
Konfederata e Sindikatave të Shqipërisë (KSSH) vlerëson se paketa e re fiskale e prezantuar nga qeveria sjell në vëmendje një çështje themelore për ekonominë shqiptare: drejtësinë në shpërndarjen e barrës fiskale dhe të pasurisë së krijuar nga puna e qytetarëve.
KSSH ka kërkuar prej vitesh që politika ekonomike e vendit të mbështetet në filozofinë sociale, solidaritetin dhe mbrojtjen e punëmarrësve. Ne kemi këmbëngulur që puna dhe pagat të mos mbajnë peshën kryesore të financimit të shtetit, ndërsa kapitali, fitimet e larta dhe pasuria duhet të kontribuojnë në mënyrë më të drejtë.
Në këtë kontekst, disa prej masave të prezantuara meritojnë të analizohen si hapa drejt një orientimi më social të politikës fiskale.
Disa nga shifrat që përcaktojnë drejtimin e paketës.
– TVSH-ja për 54 produkte bazë ushqimore propozohet të ulet nga 20% në 6%. Lista e parashikuar përfshin produkte si buka, mielli, qumështi, vezët, vaji, mishi, makaronat, frutat dhe perimet. Kjo masë synon të lehtësojë barrën mbi konsumin bazë të familjeve shqiptare.
– Pragu mujor i pagës për fashën tatimore 13% propozohet të rritet nga 200 mijë në 300 mijë lekë, ndërsa për pagat mbi 700 mijë lekë në muaj parashikohet një normë prej 32%. Këto ndryshime synojnë të lehtësojnë barrën për disa kategori të të punësuarve dhe të rrisin kontributin e pagave më të larta.
– Tatimi mbi dividendin propozohet të rritet nga 8% në 15%. Ky është një ndryshim me rëndësi për mënyrën se si tatohen të ardhurat nga kapitali, edhe pse efekti i tij duhet vlerësuar në raport me të gjithë sistemin fiskal.
– Çmimi i naftës synohet të ulet me rreth 32 lekë për litër, sipas deklarimeve të bëra për paketën. KSSH e konsideron të rëndësishme që lehtësimi të reflektohet realisht në çmimin që paguajnë qytetarët dhe në kostot e transportit.
Këto masa shoqërohen edhe me ndryshime të tjera: norma standarde e TVSH-së propozohet të rritet nga 20% në 21%, ndërsa TVSH-ja për shërbimet e hotelerisë nga 6% në 10%.
Prandaj, ndikimi i përgjithshëm i paketës duhet analizuar në mënyrë të plotë, duke marrë parasysh si lehtësimet, ashtu edhe barrën shtesë për konsumatorët dhe bizneset.
KSSH nënvizon se bëhet fjalë për masa të prezantuara në kuadër të paketës së re fiskale, efektet e të cilave do të varen nga miratimi përfundimtar dhe zbatimi në praktikë.
KSSH kërkon që Politikat sociale nuk duhet të mbeten vetëm në letër!
Për KSSH-në, ulja e TVSH-së për ushqimet bazë, lehtësimi i barrës tatimore për pagat në fashat përkatëse dhe rritja e kontributit nga të ardhurat prej kapitalit janë çështje që lidhen drejtpërdrejt me drejtësinë sociale.
Por qytetarët nuk jetojnë me përqindje dhe deklarata. Ata jetojnë me pagën që marrin, me pensionin që përfitojnë dhe me çmimin që paguajnë çdo ditë në treg.
Për këtë arsye, KSSH kërkon që ulja e TVSH-së të shoqërohet me monitorim efektiv të çmimeve, që përfitimi të shkojë te konsumatori dhe jo të përthithet nga zinxhiri tregtar. Po kështu, çdo lehtësi fiskale për punëmarrësit duhet të reflektohet në të ardhurat e tyre reale.
Ne kërkojmë gjithashtu politika të qëndrueshme për rritjen e pagave, përmirësimin e pensioneve, mbështetjen e studentëve dhe grave, mbrojtjen e familjeve në nevojë dhe zgjerimin e mundësive për strehim të përballueshëm.
Ne si KSSH: Mbështesim drejtësinë sociale, por kërkojmë garanci për zbatimin e saj!
Për KSSH-në, orientimi drejt një politike fiskale më sociale është i rëndësishëm, por nuk mund të konsiderohet i përfunduar pa rezultate të matshme.
Kërkesat tona janë të qarta:
– Të garantohet që ulja e TVSH-së për produktet bazë të reflektohet në çmimet përfundimtare!
– Të mbrohet fuqia blerëse e punëtorëve dhe pensionistëve!
– Të rritet përgjegjësia fiskale e kapitalit dhe e të ardhurave të larta!
– Të forcohet lufta kundër evazionit fiskal dhe informalitetit!
– Të përfshihen sindikatat në dialogun social për hartimin dhe monitorimin e politikave ekonomike e fiskale!
KSSH thekson se punëtorët nuk mund të mbajnë barrën e zhvillimit ekonomik pa përfituar drejtësisht nga frytet e tij. Një ekonomi e qëndrueshme nuk ndërtohet vetëm mbi fitimet e biznesit, por edhe mbi paga dinjitoze, pensione të mjaftueshme, shërbime publike cilësore dhe siguri ekonomike për qytetarët.
Drejtësia fiskale nuk është privilegj. Është një kërkesë themelore e një shoqërie që synon barazi, solidaritet dhe dinjitet njerëzor.
KSSH do të vijojë të mbrojë interesat e punëmarrësve dhe të qytetarëve, duke mbështetur çdo masë që sjell përmirësim real të mirëqenies, por edhe duke kërkuar transparencë, llogaridhënie dhe zbatim konkret.
Më shumë drejtësi fiskale!
Më shumë dinjitet për punëtorët!
Më shumë siguri për pensionistët!
Më shumë solidaritet social!
KONFEDERATA E SINDIKATAVE TË SHQIPËRISË (KSSH)
President
Kol Nikollaj
