Delegacioni sindikal shqiptar u përfaqësua nga Presidenti i KSSH-së, Z.Kol Nikollaj, dhe Zëvendës Presidentja, Znj.Anisa Subashi, ndërsa pala austriake u kryesua nga Z.Wolfgang Katzian, President i ÖGB dhe njëherësh President i Konfederatës Evropiane të Sindikatave (ETUC), i shoqëruar nga Z.David Hafner, Shef i Zyrës së ÖGB në Bruksel, si dhe Z.Marcus Strohmeier, Shef i Politikave Ndërkombëtare të ÖGB.
Në takim morën pjesë edhe Znj.Majlinda Dhuka, Ministre e Shtetit dhe Kryenegociatore e Shqipërisë në Bashkimin Evropian, Znj.Delina Ibrahimi, Ministre e Sipërmarrjes, Znj.Olta Manjani, Zv.Ministre e MEKI, si dhe këshilltari i Kryeministrit, Z.Ervin Mete.
Diskutimet u fokusuan në rolin e sindikatave në proceset integruese të Shqipërisë drejt BE, ku u theksua domosdoshmëria e forcimit të partneritetit midis qeverisë dhe sindikatave, si dhe zhvillimi i dialogut social në të gjitha nivelet. U ngritën çështje me prioritet të lartë si rritja e pagave dhe pensioneve, përmirësimi i kushteve dhe sigurisë në punë, forcimi i mekanizmave për luftën kundër informalitetit dhe korrupsionit, si edhe nevoja e hartimit të një ligji të posaçëm për rregullimin e procedurave dhe veprimtarisë sindikale në vend.
Një vend të rëndësishëm në diskutim zuri edhe mundësia e transformimit të Këshillit Kombëtar të Punës në një Këshill Ekonomik e Social me kompetenca më të zgjeruara, duke garantuar përfshirjen e plotë të partnerëve socialë në procesin e vendimmarrjes dhe politikat zhvillimore të vendit.
Kryeministri Rama vlerësoi rolin e KSSH-së si sindikata më e organizuar dhe më solide në Shqipëri, duke theksuar kontributin e saj të vazhdueshëm në jetën socio-ekonomike të vendit, në kontraktimin kolektiv, në promovimin e dialogut social dhe në funksionimin e këshillave trepalëshe vendore.
Takimi u zhvillua në një atmosferë konstruktive, duke shënuar një hap të rëndësishëm në forcimin e marrëdhënieve ndërmjet qeverisë shqiptare, sindikatave vendase dhe atyre Evropiane.
